الوسواس القهري obsessive compulsive disorder ( OCD)

الوسواس القهري

obsessive compulsive disorder ( OCD)

• انا لا اتكلم هنا من منطلق ديني ( وساوس الشيطان ) فهذا ليس موضوعنا

• أولا : كلمة Disorder في الطب تعني : اعتلال او تغير في الوظيفة ، او ظهور الوظيفة بطريقه مختله ، اي انه اقل في التصنيف من مرض Disease ، يعني اما تسمع كلمة disorder ، اعرف ان الموضوع فقط له علاقة باختلال الوظيفة ، وغالبا بيكون الموضوع ده تحت الدراسات المستمرة والتجارب ( لم يكتشف طبيعته كاملاً )

• الوسواس القهري يٌعرف بأنه : احد انواع التوتر anxiety والذي يكون فيه الشخص في وقت ما لديه أفكار أو معتقدات ، أو إحساسات ( يطلق عليها وساوس obsessions ) والتي تدفع هذا الشخص دفعاً ( قهراً / غصب عنه ) للقيام بأفعال معينه بصورة متكررة ( أفعال مجبر عليه compulsions ) او تسمي احيانا طقوس او شعائر Rituals

• هذا السلوك المتكرر ( الافعال المتكررة ) مثل تكرار غسل اليد ، اعاده التأكد من نظافه شي ما ( يغسل ايده ١٠ مرات ، واحدة تنضف الطاولة ٥ مرات ورا بعض ، واحد دخل المسجد ويرجع كل شويه يتوضأ ) ، هذه الافعال المتكررة بهذا الشكل تتداخل مع حياه المريض اليومية ( بيستهلك وقت في حاجات عملها / بيشكك فيه كل الناس اللي حواليه )

• هناك بعض الاشخاص يأتي لهم بصورة مختلفه ، حيث يكون لديهم ( معتقدات وافكار وتصورات ) ثابته حول موضوعات معينه او اشخاص معينين : واحد عنده معتقد ثابت ان كل السيدات اخلاقهم وحشه ، واحد عنده معتقد ثابت ان كل الدكاترة جزارين ، واحد عنده معتقد ثابت ان كل الاغنياء لصوص ، وهكذا ، وهذا النوع لا يؤثر علي تفاعل الشخص اليومي ولا الاجتماعي ( هتلاقيه بردو يروح للدكاترة ويكشف عندهم لكن وهو طالع من عند الدكتور يسب ويلعن ، يتجوز ويحب مراته لكن يراقبها في تحركاتها ) ، الموضوع هنا منعكس داخليا عليه وممكن الناس ( التفاعل الاجتماعي ) لا يلاحظوا هذا النوع من الوسواس

• هناك مرضي بالوسواس القهري يعرفون ( او يشكون ) ان وساوسهم ما هي الا مجرد اوهام ( لكن مقهورين عليها لا ارادياً ) .. ، وهناك مرضي به يعتقدون بصحة معتقداتهم ( لو حلفت له علي المصحف ان مش كل السيدات وحشين ولا كل الموظفين مرتشين ولا كل الاغنياء لصوص ) لن يتغير قيد انمله في رايه 👈 لا تجادله واتركه وغير الموضوع معاه

• الوسواس القهري يزيد من معدل حالات الانتحار وهو يأتي لحوالي 2.3% من الاشخاص في مرحلة من حياتهم ( يعني النسبه دي كلها بيأتي لها وسواس في فترة ما ، منهم ناس بيختفي عندهم لوحده واشخاص يستمر معاهم )
——————————
الأسباب :

• غير معروفة وان كانت لها جذور جنينيه ولكنها تزيد في التوأم المتطابق ، حيث تحدث طفرة في احد الجينات

• غالبا هذا المريض يكون لديه تاريخ قديم من المعاملة السيئة اثناء الطفوله Child abuse ، او تعرض لموقف انفعالي شديد
—————————
متي يبدأ هذا المرض مع المرضي به ؟

• غالبا يبدأ مع الطفولة ( تذكر طفوله اصحابك من المرضي به ) او في سن المراهقه

• ولكن يتشكل لديهم تماما ( الاعراض بتبدأ فعلياً ) عند سن 19 عام

————————————

يعني ايه وساوس obsessions ؟

• دوافع ، أو صور ، وأفكار لابد ان تكون متكررة ودائمة والتي لابد ان تؤدي الي ظهور انفعالات مزعجة ( تصرفات تظهر للأخرين ) والاخرين لابد ان يشعروا انها ( تصرفات غريبه / عجيبه / عصبية / مملة ) 👈 واحد شاف زوجة بتخون زوجها ، او موظف بيرتشي ، او طبيب غير امين ( دي كلها صور ترسخت في المخ لديه ) وساهمت فيما بعد في ظهور الوسواس

• وبشرط ان هذه الوساوس لا يعتمدها المنطق ولا العلم ( يعني العلم بيقولك اغسل يدك مره او اتنين بالكتير واطمن ، وهو بيغسل اكتر )

• المخ ( لا ارادياً ) يتوهم هذه الوساوس ويتبناها ( كوسلية دفاعية ) للشخص المريض : هو هيبتدي يشك في كل انثي حتي لا يحدث له مثل ما حدث للزوج الغافل ، او هيبتدي يغسل ايده اكتر من ١٠ مرات حتي لا يصاب بعدوي من مريض راح زاره او رأه وهو بيموت ، هيبتدي كل يوم يروح المستشفي يطمن علي حالته ، لانه رأي والده بيموت من السرطان .. وهكذا

• معظم الاشخاص الموسوسين عارفين ان وساوسهم ليس لها اساس من الصحة 👈 لا داعي لان تقول له انت موسوس ، هو عارف

• معظم الاشخاص الموسوسين بيحاولوا يزيلوا من عقولهم الوسواس بالتفكير في امور اخري ( لكن دون فائدة ) 👈 حاول تساعده ، هو اصلا بيحاول ومش قادر

————————————
الافعال القهرية Compulsions :

• هي سلوك ( السلوك هو فعل ) متكرر او تصرف عقلي متكرر ( اعتقاد خاطئ يطبق علي كل موقف او كل شخص او كل مجموعة من الناس ) 👈 ما تفعله داعش مثلا هو وساوس عقليه اعتقادية بان كل المسلمين كفرة ( دون تفريق ) ويظهر عليهم هذا في سلوكهم ( افعالهم ) بالقتل والذبح والحرق👈 ربنا يهديهم

• هذا السلوك القهري هو امر غير ارادي ( المريض الموسوس مجبور عليه لا ارادياً ) وهو وسيلة دفاعية من المخ كما قلنا كإعتقاد خاطئ بزيادة حماية الشخص الموسوس

• هذا السلوك والافعال الخاطئة تشغل حياة المريض ( بيضيع يومه فيها ) وتضايق الاشخاص المحيطين به ( غير معقول اني استحملك رايح جاي تغسل في ايدك وتضيع لي يومي ايضا )

• امثلة للافعال ( السلوك ) القهري :

⁃ النظافة المتكررة : غسل الايدي المتكرر

⁃ التكرار اللفظي : في مواقف الخوف تلاقيه يردد كلمات معينه من اجل حمايته ( حسب اعتقاده ) 👈لو انت متعود تذكر ربنا في كل وقت ، هذا ليس وسواس بل اطمئنان للقلب ومن افضل العبادات ، لكن ناسي ذكره جل وعلا طول الوقت ، واول ما تركب طيارة مثلا ( عشان بتخاف منها / أو حدث موقف لطيارة تفاعلت معاه زيادة ) تجلس طول الرحلة تذكر ربنا عز وجل ، واول ما تنزل منها ، اول حاجه تفكر فيها تروح كباريه ولا بار .. اظن ده وسواس عقلي 👈 ( فاذا ركبوا في الفلك دعوا الله مخلصين له الدين ، فلما نجاهم الي البر اذا هم يشركون ) صدق الله العظيم ( العنكبوت ٦٥ )

⁃ الكشف الطبي المتكرر : والدتها مثلا ماتت بسرطان الثدي ، كل يوم تروح المستشفي تراجع وكل فتره تعمل تحاليل واشعه ، واي مرض يصيبها تفتكر انه سرطان 👈 احنا الاطباء بنشوف الناس دي كتير

⁃ او تلاقي راجل كل شويه رايح يطمن ان انبوبه الغاز مغلقه ( خايف من حريق استقر في عقله ) ، او واحد كل فتره مش مطمن انه اغلق باب الشقه

⁃ الترتيب والتنظيم : في اشخاص تجده يرتب الكتب او الاشياء في منزله بطريقه معينه ( ترتيب غير منطقي ) لكن يقولك : هو كده ، ويتعصب لو زوجته مثلا ً اعادت الترتيب ( غالبا زوجته بترتب بناء علي تفكير منطقي )
——————————––

هل الوسواس القهري ده بيأتي معاه امراض اخري ؟ او يشاركه في صفاته امراض اخري ؟ ...👈👈 ( بعض الاطباء يقولوا لك دي انواع الوسواس القهري ) :

• الاجابة : نعم ، غالباً العائلة التي خرج منها الموسوس ، بيكون فيها امراض مشابه ، / أو انواع الوسواس :

• مرض الانشغال الجسمي BDD : تجد بنته او اخته او والدته ، كل شويه تنظر في المرأه او المريض نفسه : انا شفايفي منتفخة ليه ؟ حواجبي مش عاجباني ، جسمي زايد ( كل يوم توزن نفسها ) ، وتضايق اصحابها بكثرة اسئلتها عن رايهم في كل جزء من جسمها

• اعتلال التمارض Hypochondraisis : تلاقي شخص في اسرته ، كل شويه يقولك بطني بتوجعني ، انا حاسس اني تعبان ، انا مش هروح الدوام اليوم ..، مع انه سليم تماما لكن متمارض وهؤلاء اكثر ناس تاخد اجازات مرضية 👈 لا تتمارضوا فتمرضوا فتموتوا

• مرض شد الشعر Trichotillomania : قاعد يشد في شعره طول الوقت

• اعتلال تقشير الجسم Skin picking disorder : تلاقي بنت ماسكة الملقاط ، او مبرد الضوافر طول الوقت وكل شويه تشك ان في حاجه في جسمها وتظل هكذا لحد ما ضوافرها او وجهها يلتهب 👈 لو بتعملي كده مره في الاسبوع او مع الصالون ، لا ضير ، لكن مش ٢٤ ساعه في اليوم مثلا

• مرض توريت Tourette disorder : مرض ده هفرد له موضوع لانه منتشر بصراحه

• اعتلال الاحتفاظ المرضي Hoarding disorder : تلاقي ربة منزل ( زوجتك ) تحتفظ ببرطمانات من كل صنف ولون ، وملابسها القديمة واكياس من كل نوع وحاجات عفا عليها الزمن وتعتقد انها هتحتاجهم في يوم ما 👈 افتح الثلاجه هتعرف ، انظر تحت مرتبة السرير هتشوف العجب ، افتح دولاب ملابسها هتتأكد

• اعتلال الاكل المرضي Binge eating disorder : تلاقي واحد معزوم في فرح ( او فندق اوبن بوفيه ) ورايح جاي علي البوفيه شايل 20 طبق من كافه الانواع ، هو في الحقيقة مش هياكلهم ولا هيستفاد منهم ( المرض ده دخل الطب في عام 2013 ) وتلاقيه قاعد ياكل في حوالي ساعتين وياكل بسرعه جدا ، لغايه ما يحس بالشبع المؤلم ( تخمه ) وبعد ما يعمل القصه دي كلها تلاقيه يقولك : يا اخي والله انا محرج من اللي عملته ( خجلان / مستحي ) لكن انا عندي اكتئاب الايام دي ( يطلع لك تبريرات ) ، وممكن تلاقي الاشخاص دي اول ناس تروح الافراح اللي فيها اكل او البوفيهات المفتوحة ( حريص عليها جدا ) 👈 لو جوعان كل علي قدر معدتك ، لو فقير استأذن وخد معاك اكل وانت مروح بيتك ، لكن غير كده فهذا نوع من الوساوس

• الوسواس الجنسي : يعرف طبيا ايضا بزيادة الشهوة الجنسية / ادمان الجنس / Nymphomania : تلاقي شخص ( رجل او امرأه ) من اصحابك ، كل تفكيره في الجنس ، لو نظر الي انثي ( او رجل ) يراه من منظور جنسي ، مدمن ( مدمنه ) علي العادة السرية ، يشاهد افلام جنسية ( بورنو ) طول الليل ، لحد ما ينام الصبح ويتغيب عن الدوام ويحدث له هزال في جسده واعتلال في صحته ، معظم الرجال الذين يقومون بالزنا ( مقابل اموال ) يعانون من هذا المرض 👈 لماذا يعتبر وسواس ؟ 👈فكره سيطرت 👈 فعل متكرر حدث 👈 تدمير للعلاقات ولصحة الانسان ولوقته ( انظر التعريف بالأعلي )

• وسواس التأمل Ruminations OCD : تلاقي شخص يفكر حول موضوع لا نهايه له ، وغالبا هذا الموضوع لا يكون هناك رد قطعي عليه : مثل البيضه اتخلقت الاول ولا الدجاجه ؟ ماذا سوف يحدث لي ( للشخص ده ) بعد الموت ؟ 👈 المشكله هنا ان كل تفكيره لا يأتي بحل مقنع له ويصبح هذا الموضوع شاغله ( التأمل المنتهي بحلول منطقيه واختراعات حقيقيه ليس مرضا بل إعمالا للفكر )

• وسواس التطفل intrusive thought : تجد زوجة ما او حبيبه دائما تضع زوجها تحت الميكروسكوب وتحلل افعاله وهمساته ونظراته ( بدون داعي ) لتتحصل علي خطأ ( بتدور له علي غلطة ) / دائما تبحث عن التطمين والاعجاب من زوجها ( لو عملت لك اكله ، 20 مرة تسألك الاكل عجبك ) / دائما عندها شكوك ان جوزها بيخونها ( مفيش دليل عندها لكن بتتطفل علي تفكيره ، لو شارد الذهن مثلا يبقي بيفكر في انثي غيرها )

• تطفل الافكار الجنسية Sexual intrusive thoughts : تلاقي زوجة مثلا وعندها اولاد ( بنت او ولد ) ودايما تحذرهم : اوعي راجل يلمسكم ، ممنوع تسلموا علي حد غريب ( هي اصلا هنا خايفة بزيادة ان كل غريب سيقوم باغتصاب اولادها ) / تجد شخص من كتر ما سمع قصص عن زنا المحارم ، يبتعد ويخاف انه يحضن بنته الصغيره مثلا او ابنه الطفل

• وسواس التشائم Magical intrusive thought : عنده هوس ان يوم الاتنين شؤم مثلا ، اللون الاسود يجلب النحس ، لو قابلت شخص ما في اول اليوم ، هيبقي يوم نحس ، وهكذا .....

• وسواس اليأس الديني religious intrusive thoughts : عنده هوس دائم ان المعصيه التي عملها لن يغفرها الله / او دايما يقولك صلاتك مش نافعه

• وسواس العنف Violent intrusive : تلاقي واحد عنيف جدا مع اللي بيحبهم ، يضربهم باستمرار لكن لا يستطيع ولا يستغني عنهم / المجرمين الذين يقومون بالسرقة بالاكراه ( ممكن تقابل لص منهم ويطلب منك الاموال اللي معاك وتديهاله وبعدها يضربك بسكين ، مع ان الضرب هنا ملوش سبب ، ده مريض )
——————————
كيف أشخص واحد عنده وسواس قهري ؟

• اتابعه والاحظه ملاحظة دقيقه واحسب الوقت الذي يأخده في اعاده تكرار الفعل المجبر عليه Compulsions ، لو زادت عن ساعة في اليوم يبقي مريض : واحد كل شويه يغسل ايده ، عشان يتأكد من نظافتها ، احسب له كم مرة غسل يده في كم من الوقت : لو طلع انه استهلك ساعة كامله علي مدار اليوم في عمليه غسل ايده يبقي عنده وسواس ، وقس علي ذلك باقي الانشطة 👈 هذا التشخيص للعامة ( غير الاطباء النفسيين ) 👈 يعني طريقة سهلة

• وهذه الساعة ( الوقت الضائع ) شرط ان تتداخل مع التعامل اليومي ( له ) او التفاعل الاجتماعي ( مع الناس ) بصورة تعطل الحركة : قاعد يغسل ايده لغايه ما اتأخر عن شغله ، ترك الاكل يبرد عشان مشغول في غسل ايده ، معاه اصحابه وداخل طالع علي الحمام والناس عاوزين يخرجوا وهو معطلهم ... ( قس علي ذلك باقي التصرفات )

• هناك طريقة ايضا في التشخيص تعرف ب Yale-Brown obsessive compulsive scale ( في عيادات الطب النفسي )
————————
العلاج في المنشور القادم بإذن الله