الدفاع عن النفس

بسم الله الرحمن الرحيم
موضوع النهارده هعتبره مقدمه عن سلسله وموسوعه مهمه جدا هبدأ في طرحها تخص الدفاع عن النفس
بس قبل مابدأ في السلسله دي لازم تقرا الموضوع ده كويس جدا وتاخد بالك من النقاط اللي هنطرحها علشان تقدر تستفيد من الشروحات اللي هتتحط وتقدر تنفذها على ارض الواقع
طيب نبدأ المقدمه دي بسؤالين
السؤال الاول :
فيه كام واحد بيتدرب على الرياضات القتاليه بمختلف انواعها على مستوى العالم ؟
اجابة السؤال ده هو ملايين الأشخاص
السؤال الثاني :
كام واحد منهم بيقدر يدافع عن نفسه ويستفيد من التدريبات دي لما بيتحط في مواجهه حقيقيه ؟
مش كتير !!
الأسباب اللي جعلت الناس دي ماتقدرش تدافع عن نفسها في المواقف الحقيقيه .. هنتعرف عليها في موضوعنا
اولا لازم نستبعد ان العيب ممكن يكون في الفن القتالي نفسه لان كل الفنون القتاليه اقوى من بعض
ثانيا فيه بعض العوامل اللي لازم تفهم انها السبب في قدرتك للدفاع عن نفسك لما تتحط في موقف حقيقي
1 - التوقع : مافيش قتال بيبدأ فجأه ياعني القتال بيبقى سببه مشكله في الاول وبتتطور وتوصل للقتال او بيبقى سطو عليك .. فهنا لازم تبقى مستعد ومتوقع للقتال ومايبقاش مفاجأه بالنسبالك علشان تقدر تتعامل معاه ولا يحدث ارتباك
2 - اسبق الخصم بخطوه : لازم انت اللي تدير القتال وتسبق الخصم في افكاره وتحركاته .. ياعني مثال لو الخصم مسك عصا واتوجه اليك .. في بداية مسكته للعصا لازم تبقى عارف انت هتتصدى للضربه ازاي .. هل بتجنبها ام بالتصدي لها بالقتال ؟
ولازم تتوقع شكل الضربه هتجيلك ازاي .. وفيه حاجات بتبقى عامه للضربات ياعني مثلا انا لو اعطيت واحد عصا الأن وقولتله اضربني بيها معروف اوي شكل الضربه اللي هيوجهالي .. يبقى اول مايمسك الخصم العصا لازم تحط شكل الضربه دي في دماغك وتبدأ تفكر بطريقة الدفاع
3 - الذكاء : عنصر مهم جدا بدونه لن يكون هناك اهميه للنقطتين السابقتين .. ياعني هنفترض انك توقعت القتال ولم ترتبك و عرفت طريقة الضربه الموجهه اليك .. ممكن لو اتصرفت مع الحركه بطريقه غير ذكيه او خاطئه تدمر العنصرين السابقين
هنفترض نفس مثال القتال بالعصا وهنطبق عليه مفهوم الذكاء .. لو الشخص اللي امامك ماسك عصا صغيره وانت واقف على مسافه بعيده عنه لو فكرت انك تتصدى للضربه دي بالقتال يبقى كده انت خسرت .. لازم وقتها تتصدى للضربه دي بتجنبها لان المسافه مش في صالحك واحتمال توجيه الضربه ليك نسبتها كبيره .. اما لو انت مصمم انك تتصدى للضربه بالقتال يبقى لازم كما ذكرنا في النقطه السابقه ان اول ما الخصم يبدأ يمسك بالعصا تتوجه اليه مباشرة وتقلل المسافه بينك وبينه علشان تقدر تتصدى للضربه
4 - التدريب على التكنيك مع صديق : لازم اي تكنيك قتالي تتعلمه تبدأ تتدرب عليه مع صديقك او اخوك في البيت ولا تعتمد على المدرب فقط .. لما تتعود على التكنيك كتير بصوره صحيحه هتلاقي نفسك بتطبقه وقت الحاجه لا ارادي ومش هيبقى صعب عليك
ومن هنا يتضح ان النقاط المذكوره سابقا مترابطه وليها علاقه ببعض
انا مش عايز اطول عليكم اكتر من كده بس نركز اوي في الكلام اللي اتشرح علشان تقدر تصنع الفرق بينك وبين اي حد تاني بيتدرب فنون قتاليه
ان شاء الله المره الجايه هنبدا نشرح تكنيكات القتال وطريقة الدفاع عن النفس في حالات كتير
والسلام عليكم