مدرسة الفنون القتالية

بسم الله الرحمن الرحيم
عندي موضوعات كتير عايز اتكلم فيها بس في مجالات مختلفه وهتلخص حاجات كتير واستفسارات كتير بتشغل الناس فاخترت اني اعملهم على هيئة سؤال وجواب علشان يبقى سهل على الاعضاء و فرصه لو حد عنده اي سؤال يساله في البوست ده وهجاوب عليه باذن الله
س 1 / امارس انهي رياضه قتاليه او ما هي افضل و اقوى رياضه قتاليه ؟
ج / كل الرياضات القتاليه قويه جدااا وانا عندي قناعه شخصيه ان مافيش فن قتالي اقوى من التاني بس مبدئيا كده مارس الفن القنالي اللي انت بتحبه وعايز تتعلمه
س 2 / كم عدد الفنون القتاليه وماهي انواعها ؟
ج / اعداد الفنون القتاليه كتير ومازالت في ازدياد .. لكن انواعها ممكن نصنفها
1- انواع بتعتمد على القتال باليد ( ملاكمه )
2- انواع بتعتمد على القتال بالرجل (تايكواندو )
3- انواع بتعتمد على الاشتباك والشد والجذب ( جودو )
4 - انواع بتعتمد على القتال الارضي ( جيوجيتسو )
5 - انواع بتعتمد على استغلال الدفاع لبناء هجوم او استغلال هجوم الخصم ضده ( ايكيدو )
6 - انواع يكون القتال فيها خليط من اكثر من نوع واحد ( الكونج فو )
س 3 / انا مش بعرف في الفنون القتاليه اتدرب ايه افضل ؟
ج / لو مش بتعرف في الفنون القتاليه تقدر تتصفح الصفحه هنا وهتلاقي تعريفات عنها
مش عايز تتصفح وعايز تلعب اي فن قتالي وخلاص يبقى اختار افضل مدرب في فنه القتالي لان النصابين في المجال ده بقوا كتير جدا وقبل ماتتدرب اسال عن الشهادات اللي حاصل عليها وتاريخه التدريبي
س 4 / انا عندي 50 سنه ممكن العب فن قتالي ؟
ج / ممكن طبعا بس هتبدا تبعد عن الفنون القتاليه اللي بتتطلب لياقه بدنيه عاليه زي الكونج فو والتايكواندو وتبدا تتجه لرياضات قتاليه زي الايكيدو و الجودو
ملحوظه .. الجودو في مراحله المتقدمه بيتطلب لياقه بدنيه وطبعا انت مش لازم توصل للمستوى او المرحله المتقدمه دي
س 5 / ماهي انسب رياضه قتاليه للبنات للدفاع عن نفسها ؟
ج / كل الرياضات القناليه مناسبه للبنات وتقدر البنت تمارس اي رياضه منها
س 6 / انا لو بنت ومارست رياضه قتاليه هيطلعلي عضلات ؟
ج / تخيلي اني لص وداخل اسرق منك شنطتك في مكان مقطوع .. وحضرتك حطيتي ايدك في عيني .. هل الحركه دي كانت محتاجه عضلات ؟ بالطبع لا
اللي عملتيه ده اسمه تكنيك قتالي وده اللي بتعتمد عليه اغلب الفنون القتاليه ومش بيحتاج لعضلات علشان تعمليه .. بس بيحتاج لجسم واخده بالك منه ومهتميه بيه من حيث الغذاء الصحي و الرياضه
س 7 / انا بمارس رياضه قتاليه بس لاحظت اني لما بدخل قتال مع حد مش بطبق اللي اتعلمته وبتخانق بطريقه عاديه زيي زيه ؟
ج / دي بيبقى ليها اكتر من عامل
يا اما انت مش بتطبق اللي بتتدربه مع زمايلك في التمرين
او لما بتدخل جو القتال بترتبك او بتخاف فدماغك مش بتفكر في اللي انت اتدربته وبتحاول تعمل اي حركات قتاليه وخلاص حتى لو كانت زي اللي قدامك بيعملها
وده حلها انك لازم يكون عندك ثبات وهدوء نسبيا اثناء القتال وتستخدم اللي انت اتعلمته وتطبقه
س 8 / هو اللي بيحصل في الافلام ده حقيقي ياعني ممكن اضرب 15 واحد من غير ماتضرب واجري عالشجر ؟
اكيد لا طبعا مافيش الكلام ده بس انت ممكن تستغل مشاهدتك للافلام انها تديك طاقه تنزل تتمرن بيها مش اكتر